പ്രിയദര്‍ശനം

ജനാധിപത്യ പ്രക്രിയയിലെ പങ്കാളിത്തം വോട്ടിങ് പ്രായം എത്തുന്നതിനു മുൻപേ തന്നെ തന്നെ ഉറപ്പാക്കാൻ പറ്റിയ അപൂർവ്വമായ ഒരു അവസരമായിരുന്നു എൻഎസ്എസ് വളണ്ടിയർമാരെ പോളിംഗ് ബൂത്തുകളിൽ ഡ്യൂട്ടിക്കായി നിയോഗിക്കുന്ന ഉത്തരവോടെ വളണ്ടിയർമാർക്ക് ലഭിച്ചത്. അതുതന്നെയാണ് ഈ പ്രക്രിയയിൽ പങ്കാളിയാകുന്നതിലേക്ക് എന്നെ ആകർഷിച്ച ഘടകവും. ബാലുശ്ശേരി നിയോജകമണ്ഡലത്തിൽ 24-ാം നമ്പർ ബൂത്തായ ജി എൽ പി സ്കൂൾ പെരുവച്ചേരിയിലെ ബൂത്ത് ആയിരുന്നു ഞാൻ ഡ്യൂട്ടിയ്ക്കായി തിരഞ്ഞെടുത്തത്. ബാലുശ്ശേരി നിയോജകമണ്ഡലത്തിലെ എൻഎസ്എസ് വളണ്ടിയർമാരെ നിയന്ത്രിക്കുന്നതിനായി നിയോഗിക്കപ്പെട്ടിട്ടുള്ള എൻഎസ്എസ് പ്രോഗ്രാം ഓഫീസർ ജയരാജ് സാറിന്റെ നിർദ്ദേശപ്രകാരം ഐഡി കാർഡ് കൈപ്പറ്റുന്നതിനായി ഞാനും തീർത്ഥയും തലേദിവസം തന്നെ അവിടെ എത്തിച്ചേരുകയും അവിടെനിന്ന് പ്രിസൈഡിങ് ഓഫീസറെ കാണുകയും ചെയ്തു. ഞങ്ങൾക്ക് ലഭിച്ച നിർദ്ദേശങ്ങളെപ്പറ്റിയുള്ള പ്രാഥമിക കാര്യങ്ങളെപ്പറ്റി അദ്ദേഹം ചോദിക്കുകയും ഞങ്ങളുടെ മറുപടിക്ക് ശേഷം ഞങ്ങൾ നിർവഹിക്കേണ്ടുന്ന ഡ്യൂട്ടികൾ അദ്ദേഹം വിശദീകരിച്ചു തരുകയും ആണ് ചെയ്തത്. അവിടുന്ന് ഐഡി കാർഡ് കൈപ്പറ്റിയ ശേഷം ഏറെ ആവേശത്തോടെ ആ തിരഞ്ഞെടുപ്പ് ദിനത്തിനായി ഞങ്ങൾ കാത്തിരിക്കുകയായിരുന്നു.

രാവിലെ ആറ് മുക്കാൽ ആയപ്പോഴേക്ക് ഞങ്ങൾ സ്കൂളിൽ എത്തിച്ചേർന്നു. അപ്പോഴേക്കും തന്നെ 902 വോട്ടർമാരുള്ള ആ ബൂത്തിൽ വോട്ടർമാരുടെ ഒരു വലിയ നിര തന്നെ കാണാൻ സാധിച്ചിരുന്നു രാവിലെ ജോലിക്ക് പോകാൻ തയ്യാറായി നിൽക്കുന്നവരാണവരെന്ന് മനസ്സിലായി. അവിടെയുള്ള ഹോം ഗാർഡും പ്രിസൈഡിങ് ഓഫീസറും നിർദ്ദേശിച്ചത് പ്രകാരം ക്യൂ നിയന്ത്രിക്കാനുള്ള ഡ്യൂട്ടി ഞങ്ങൾ ഏറ്റെടുത്തു. അതിനിടയിൽ പലരും ഞങ്ങളെ കണ്ട് വോട്ടിംഗ് പ്രായമായോ എന്ന് അതിശയിക്കുകയുണ്ടായി അവരോടൊക്കെ അല്ല ഞങ്ങൾ എൻഎസ്എസ് വളണ്ടിയർമാരാണ് ഞങ്ങൾ ഇലക്ഷൻ ഡ്യൂട്ടിയിലാണ് എന്ന് മറുപടി പറയുമ്പോൾ ഉണ്ടായ അഭിമാനം ഈ അനുഭവത്തെ കൂടുതൽ മനോഹരമാക്കി.
ഏതാണ്ട് 9 മണിയോടെ പ്രായമായവരും ശാരീരികാസ്വാസ്ഥ്യം അനുഭവിക്കുന്നവരും ബൂത്തിലേക്ക് എത്താൻ തുടങ്ങി. വളരെ വലിയ ശാരീരിക ബുദ്ധിമുട്ടുകൾക്കിടയിലും വോട്ട് ചെയ്യുക എന്നുള്ള അവരുടെ അവകാശം നിറവേറ്റാനായി വേദനകൾ പോലും വകവെക്കാതിരിക്കുന്ന അവരുടെ മനോഭാവം ഞങ്ങൾക്ക് വലിയ പ്രചോദനമായി. വേനൽചൂട് ഉച്ഛസ്ഥായിലായപ്പോഴും അവിടെയുള്ള എല്ലാവരുടെയും ആവേശം എടുത്തു പറയേണ്ടതായിരുന്നു. തിരിച്ചറിയൽ കാർഡ് എടുക്കാൻ മറന്നു പോയവർ പോലും വളരെ ദൂരെയുള്ള വീട്ടിലേക്ക് തിരിച്ചുപോയി അത് എടുത്തു വന്നു വോട്ട് ചെയ്യുന്ന സാഹചര്യം പോലും ഉണ്ടായി. അവർക്ക് ചൂടോ വെയിലോ മുന്നിൽ നടക്കാനുള്ള ദൂരമോ ഒക്കെ വോട്ടവകാശം എന്ന പൗരാവകാശത്തിന് മുന്നിൽ അപ്രസക്തമായിരുന്നു. പ്രദേശവാസികളുടെ അകമഴിഞ്ഞുള്ള പ്രവർത്തനങ്ങൾ കാരണം, വീൽചെയർ സൗകര്യം അടക്കം സർവ്വവും സജ്ജമായിരുന്നു.. നാട്ടുകാരുടെയും പാർട്ടി പ്രവർത്തകരുടെയും വലിയ സഹായസഹകരണ സഹകരണങ്ങൾ ഉണ്ടായതിനാൽ വലിയ രീതിയിൽ ഞങ്ങൾക്ക് ഇടപെടലുകൾ നടത്തേണ്ട ആവശ്യം പോലും ആ സമയങ്ങളിൽ ഉണ്ടായിരുന്നില്ല. ഞങ്ങൾ ക്യൂ നിയന്ത്രിച്ചും നടക്കാൻ ബുദ്ധിമുട്ടുള്ളവരെ സഹായിച്ചും ഞങ്ങൾ കർമ്മനിരതരായി തുടർന്നു. വെയിലിന്റെ ചൂട് കൂടാൻ തുടങ്ങിയതിൽ പിന്നെ വോട്ടർമാരുടെ എണ്ണത്തിലും കുറവ് കാണാൻ സാധിച്ചു .പിന്നീട് വോട്ടർമാർ കുറച്ചു കുറച്ചായി വന്ന് വോട്ട് ചെയ്യുന്ന രീതി കാണാനായി. നാട്ടുകാരുടെ സഹകരണം മൂലം കൃത്യസമയത്ത് തന്നെ തെരഞ്ഞെടുപ്പ് ഉദ്യോഗസ്ഥർക്കും സ്പെഷ്യൽ പോലീസ് ഓഫീസർക്കും എൻഎസ്എസ് വളണ്ടിയർമാർക്കും എല്ലാം ഭക്ഷണം ലഭിച്ചിരുന്നു. അതിനിടയ്ക്ക് അവിടെ കറണ്ട് പോയപ്പോൾ വളരെ മാതൃകാപരമായി വെബ്ക്യാം ഓപ്പറേറ്ററും ഹോം ഗാർഡും ഒക്കെ നടത്തിയ ഇടപെടലുകൾ കണ്ടതോടെ എങ്ങനെ ചടുലതയോടെ പ്രശ്ന പരിഹാരം നടത്തം എന്നതിനുള്ള ബാലപാഠങ്ങൾ ഞങ്ങൾക്ക് ലഭിക്കുകയുണ്ടായി. ഉച്ചയ്ക്ക് ശേഷം വന്നവരിൽ ശാരീരിക ബുദ്ധിമുട്ടുള്ളവരെ നടക്കാൻ സഹായിക്കാനും ഒപ്പം തന്നെ വോട്ടർമാർക്ക് കൃത്യമായി നിർദ്ദേശങ്ങൾ നൽകി വോട്ടിങ് പ്രക്രിയ എളുപ്പത്തിൽ ആക്കാനും ഞങ്ങൾക്ക് സാധിച്ചു. താരതമ്യേന ചെറിയ ബൂത്ത് ആയതിനാൽ പ്രവർത്തനങ്ങൾ എല്ലാം 6 മണിയോടെ പൂർണമായതിനാൽ ആറുമണിവരെയുള്ള അവിടുത്തെ കൃത്യമായ സേവനത്തിന് ശേഷം ഇലക്ഷൻ സുഗമമായും വളരെ ദ്രുതഗതിയിലും നടത്തിയ തെരഞ്ഞെടുപ്പ് ഉദ്യോഗസ്ഥരോടും സ്തുത്യർഹമായ സേവനമനുഷ്ഠിച്ച സ്പെഷ്യൽ പോലീസ് ഓഫീസറോടും ബൂത്തിലെ ദൃശ്യങ്ങൾ പ്രസ്തുത കേന്ദ്രങ്ങളിൽ ദൃശ്യമാക്കുന്നതിനായി പ്രവർത്തിച്ച വെബ്ക്യാം ഓപ്പറേറ്ററോടും ആ ബൂത്തിനെ മാലിന്യമുക്തമായി നിലനിർത്തിയ ഹരിത കർമ്മ സേന അംഗങ്ങളോടും നന്ദിയും യാത്രയും പറഞ്ഞു ഞങ്ങൾ ഇനിയങ്ങോട്ട് എന്നും ഓർമ്മയിൽ സൂക്ഷിക്കാൻ പോകുന്ന ആ വലിയ ദിനത്തിന്റെ കനമുള്ള ഓർമ്മകളുമായി ബൂത്തിൽ നിന്ന് ഇറങ്ങി. തിരിച്ചു പോകുമ്പോൾ ഇന്ത്യൻ ജനാധിപത്യത്തിന് മഹോത്സവം എന്നു തന്നെ വിളിക്കാൻ സാധിക്കുന്ന ഈ തെരഞ്ഞെടുപ്പിലെ ഭാഗമാകാൻ സാധിച്ചതിലുള്ള കൃതജ്ഞത മാത്രം.

Niyati Darsan Karat
GHSS Naduvannur
Booth: GLPS Peruvachery